رح تتخرج بعد تلات سنين من بعد ما عشت القرف وفرجاك بلدك الذل وسلب منك عمر المرح والمراهقة، كبّرك خصباً عنك… رح تخلص مدرسة وتسافر وتهرب عند خالك، يلي هرب قبلك!
… بغضب عليك اذا بترجع والله بغضب عليك اذا بترجع!
يا “مام” يا نبض قلبي، انساني وما تشتقللي … وما تشتاق لستك وخالك واصحابك …ما تطلع وراك … بس هروب!
ليك … رح اعطي كل الـ Cd تبع الـ Playstation لاصحابك وطاباتك رح وزعها، يلي كنا نطجها سوا بالملعب منشان ما تشتقلهم، ورح محّي أرقام أصحابك يلي بتتواصل معن حتى ما تشتقلن ولا يشتقولك…
ورح بيع التخت يلي كنّا نلعب، ناكل ونسهر عليه انا وياك ومنتابع المباريات والرياضة منشان ما تقللي اشتقت لتختي …
ليك ياحبيبي … انا رح احرم حالي من البوسة الصباحية والغمرة الظهرية والخبرية المسائية، بس من خوفي عليك من رصاصة طايشة، وطرقات خطرة ودولة فاسدة! تنازلت عن كل احلامي معك … كرمال ما ترجع عاهالبلد، لأني بطلت قادرة إحميك من المافيات العايشة على أرضنا وحاكمتنا بدي ياك تنسى بلادك … تنسى كل التعب اللي مرقنا فيه هون، من طوابير البنزين والبهدلة يللي نطرنا فيها سوى .. تنسى روحات السوبر ماركت تنفتش عن البضاعة الارخص …
تنسى العتمة والشوب وقطعة الكهربا والانترنت … تنسى كل شي مرقت فيه هون وانا بعتذر ماقدرت احميك منه.
بدي تنسى القلق والخوف والظلم … بس بدي منك شغلة وحدة… بس… امانة برقبتك تبعت ورا خيّك واذا قدرت تبعت ورايي …
وإياكم ترجعوا…..لا، لا ما ترجعوا… رح تاخدوا قلبي وروحي معكن بس اوعى ترجعوا
حتى جنازتي لاتحضروها … ضلك هربان، لان بدي طمن راسي حتى انا وتحت التراب انك بأمان … بلبنان بيقتلوك، بيسرقوك، بيخطفوك، بزعلوك ….شو بيجي على بالك بيعملوا فيك … ما ترجع!
المهم ما بقى تتنفس من هوا هالبلد … ولا تمشي على أرضه ولا تحت سماه، وصدقني يا إبني هيدا البلد هوي خسرك أنت ما ربحت شي منه!
برضاي عليك تنفذ اللي عم امنك عليه، لانه أكتر من الهريبة مش قادرة امنلك !
إمك يلي بتعبدك
جوزيان حداد
