يا لبناني، ما بعرف اذا انت كسلان او منك سئلان أو مش عرفان … ما عم بقدر أعرف شو صاير معك ! سرقوا رصيدك وحوّلوه لدولار ورجعوا ردوا على اللبناني وهلا رجعوا ردوا دولار وخسرت بهل عملية والتحويلات وضليتك ساكت!
يا لبناني، انت لا بتهش ولا بتنش ولا خرج شي، مستسلم ومسلّم أمرك لربك وعايش على الهامش ، بس السهرات والضهرات من الاساسيات …
غلوا الخبز يلي كان اللقمة الوحيدة يلي بياكلها الفقير، و ما جربت تنهز الا لتوقف بطوابير الذل…
غلوا البنزين وما تحركت او اعترضت! وطوا معاشك وما قدمت استقالتك…
سرقوك نهبوك، عيشوك متل المهجر بأرضك وما نهزلك رمش …
غلوا الغاز والمازوت وقطعوا عنك الدوا وصرت متل الشحاد تنبش على شي حتى يشفيك ومن العلة يشيلك وما حكيت….
جبروك تدفع كاش قبل ما تفوت عالمستشفى، عوّفوك ربّك وهانوك وما وقفت بوجهم وحكيت ….
قطعوا عنك الكهربا وغلوا الاشتراك، وعيشوك بالعتمة ورجعوك على كياس الشمع المقطوع، تعودت وما شكيت …
حطوا اقساط المدارس والجامعات بالدولار ومعاشك بالليرة اللبنانية، وكل ولد بكلفك قد بقرة جحا، وضليتك تقول اهم شي الولاد وعلمهم …
غلوا الاكل على انواعه والكل بسعر على مزاجه وما في لا حسيب ولا رقيب، بركي بتحكي، عودت نفسك على اكلات جديدة، حتى بنظامك الغذائي اتدخلوا، وما وقفت تشتري، وغشيت ونغشيت …
قطعوا عنك الباسبورات ومنعوك تهاجر، حتى الاوراق الرسمية مش موجودة، وتيكتات الطيران تدوبل سعرها وما حكيت….
ثالث اكبر انفجار بالعالم، هزّ الدني، ولليوم الدموع ما نشفت وما عملت شي …
كل يوم بتفيق على خازوق جديد، بتنكد وبتشكي … بس ما عملت شي!
يا لبناني، يلي عيش بالمصايب، انت خرج تنسرقك … انت بتستاهل، لانك ما عم تواجه …
وين الزلم والرجال، شو ناطر، بدنا يوسف بك كرم جديد … بدنا ثورة كلها انسانية واندفاع … بدنا عنفوان وكرامة … بدنا هجوم بدنا حقوقنا المهدورة …
ليش ساكت مستسلم وخيفان؟ …غير الروح ما تركولك … فيق من هالغيبوبة، انت كرامة مسلوبة !!!
جوزيان حداد
